23 மீனவர்கள் விரைவில் விடுதலை: இலங்கை துணைத் தூதரகம்

சென்னை, ஜூன் 23: 23 தமிழக மீனவர்கள் விரைவில் விடுதலை செய்யப்படுவார்கள்
என்று இலங்கை துணைத் தூதரகம் அறிவித்துள்ளது.
இது குறித்து இலங்கை துணை தூதரகம் வியாழக்கிழமை வெளியிட்ட அறிக்கை:
இலங்கை கடல் எல்லைக்குள் மீன் பிடித்துக் கொண்டிருந்த 23 மீனவர்களை ஜூன்
20-ம் தேதி இலங்கை கடற்படை கைது செய்தது. மேலும் அவர்களிடமிருந்து 5 இந்திய மீன்பிடி
இழுவை படகுகளும் பறிமுதல் செய்யப்பட்டன. இந்த சம்பவம், இலங்கையின் தலைமன்னார்
கடற்கரையில் இருந்து 6 கடல் மைல் தொலைவில் நடந்துள்ளது. இலங்கை கடற்படை, இலங்கையின்
சட்டத்துக்கு உள்பட்டுதான் அந்த மீனவர்களை கைது செய்தது.
இரு நாட்டு மீனவர்களும், கடல் எல்லைக் கோட்டைத் தாண்டும் விஷயத்தில் சுலபமான
விதிமுறைகளைக் கையாண்டு, அவர்களை விடுதலை செய்யும் நடவடிக்கைகளில், சென்னையில் உள்ள
இலங்கை துணைத் தூதரகமும், தமிழக மீன்வளத் துறையும் செயல்பட்டு வருகின்றன.
விரைவில் விடுதலை: கடல் எல்லைக் கோட்டை மீறியதற்காக கைது செய்யப்பட்ட 23
இந்திய மீனவர்கள், அவர்களுடைய படகுகளுடன் நீதிமன்றக் காவலில் பாதுகாப்பாக உள்ளனர்.
உரிய விதிமுறைகள் பின்பற்றப்பட்டு, அவர்கள் விரைவில் விடுதலை செய்யப்படுவார்கள்.
மீனவர்கள் கெüரவமாகவும், மனிதாபிமான முறையிலும் நடத்தப்படுகிறார்கள்.
மீனவர்கள் 23 பேரும் படகுகளுடன், உரிய நடைமுறைகள் முடிந்த பிறகு, இலங்கை
அதிகாரிகளால், விரைவில் மீண்டும் இந்தியாவுக்கு அனுப்பி வைக்கப்படுவார்கள் என்று
இலங்கை துணை தூதரகம் தெரிவித்துள்ளது.