தமிழகத்திற்கு விடுதலை: திருமண உதவித்திட்டத்திற்கான முதல் கோப்பில் ஜெ., கையெழுத்து

சென்னை: தமிழக மக்கள் மற்றுமொறு விடுதலைப்போராட்டம் நடத்தியுள்ளனர்.
நேற்று முதல் தமிழ்நாடு விடுதலை அடைந்து விட்டது என்று முதல்வர் ஜெயலலிதா
தெரிவித்தார். தமிழக முதல்வராக இன்று பிற்பகல் பொறுப்பேற்றுக் கொண்ட
ஜெயலலிதா, மாலை கோட்டையில் தனது பொறுப்பை ஏற்றுக்கொண்டார்.
தனது போயஸ் கார்டன் வீட்டிலிருந்து கிளம்பி சரியாக மாலை 6.40 மணியளவில்
கோட்டை வந்த அவருக்கு, அரசு மற்றும் போலீஸ் உயர் அதிகாரிகள் மலர் கொத்து
கொடுத்து வரவேற்றனர். பின்னர் முதல்வர் அறைக்கு வந்த அவர், முதல் கோப்பில்
கையெழுத்திட்டார். முதல்வர் வருகைக்காக போக்குவரத்து தடை செய்யப்படவில்லை.
கோட்டையில் முதல்வராக பொறுப்பேற்றுக்கொண்ட ஜெயலலிதா தனது முதல்
உத்தரவாக, பெண்கள் திருமண உதவிதிட்டத்திற்கு ரூ. 25 ஆயிரமும், 4 கிராம்
தங்கமும் வழங்குவதற்கான ஆணையில் கையெழுத்திட்டுள்ளார். இளநிலை மற்றும்
டிப்ளமோ படித்த பெண்களுக்கு ரூ. 50 ஆயிரம் வழங்கவும் ஆணையிட்டுள்ளார்.
தனது இரண்டாவது உத்தரவில், முதியோர்க்கான உதவித்தொகை ரூ. 500 ல் இருந்து
ஆயிரமாக உயர்த்தும் உத்தரவி<லும் அவர் கையெழுத்திட்டார். இதுபோன்று,
ஏழைகளுக்கு மாதம் ஒன்றிற்கு 20 கிலோ அரிசியும், பரம ஏழைகளுக்கு 35 கிலோ
அரிசி வழங்கும் உத்தரவிலும் ஜெ., கையெழுத்திட்டார். பெண் அரசு
ஊழியர்களுக்கான பேறு கால விடுப்பை 6 மாதங்களாக அதிகரித்தும் அவர்
உத்தரவிட்டுள்ளார். மீன்பிடி தடை காலத்தில் மீனவர்களுக்கு வழங்கப்படும்
உதவித்தொகை ரூ. 2 ஆயிரமாக அதிகரிக்கப்பட்டுள்ளது. தேர்தல் வாக்குறுதிகளை
நிறைவேற்ற புதிய அமைச்சகம் ஏற்படுத்தப்படும் என்றும், இதற்காக தனியாக
அமைச்சர் ஒருவர் நியமிக்கப்படுவார் என்றும் ஜெ., அறிவித்துள்ளார்.
பின் நிருபர்களிடம் பேசிய அவர், நேற்று முதல் சங்கிலி பறிப்பு
நிகழ்வுகள் ஏதும் தமிழகத்தில் நடக்கவில்லை என்ற செய்தி வந்துள்ளது. இனி
தமிழகம் கொள்ளையர்கள் இல்லாத மாநிலமாக இருக்கும். மக்கள் பயமின்றி
தைரியமாக இருக்கலாம். தமிழக மக்கள் மற்றுமொரு விடுதலைப்போராட்டம்
நடத்தியுள்ளனர். நேற்று முதல் தமிழ்நாடு விடுதலை அடைந்து விட்டது என்று
முதல்வர் ஜெயலலிதா தெரிவித்தார்.