ஒரு வார ஜெ. ஆட்சி - ஒரு பார்வை

ஒரு வார கால நடவடிக்கைகளை வைத்து, ஒரு
ஆட்சியை முழுதாக எடை போட முடியாது தான். இருப்பினும் செல்ல ஆரம்பித்துள்ள
பாதையாவது மக்கள் எதிர்ப்பார்ப்பின் திசையில் உள்ளதா என்று பார்ப்போம்.


இந்த ஆட்சியில் ஜெ.விடம்
காணப்ப்டும் முக்கிய மாற்றம் செய்தியாளர்களைச் சந்திப்பது. தொடர்ந்து
சந்திப்பேன் என்று உறுதிமொழியும் கொடுத்துள்ளார். மக்களோடு உறவாட அதுவும்
ஒரு முக்கியமான வழியே. சென்ற ஆட்சிகளில் நடந்ததைப் போல் தன் வீட்டுக்
கதவினை இறுக்கச் சாத்திக்க்னொண்டு, நாட்டில் நடப்பது என்னவென்றே தெரியாமல்
இருக்காமல், இப்படிக் கலந்துரையாடுவது நல்ல மாற்றமே.
மக்கள் இந்தத் தேர்தலில் தங்கள் அடிப்படைப் பிரச்சினையாக முன்வைத்தது மின்வெட்டையும், சட்டம்-ஒழுங்கையும் விலைவாசியையுமே.


ஒரு வார காலத்தில்
தீர்க்கப்படக்கூடிய பிரச்சினை அல்ல மின்வெட்டு. இருப்பினும் அதற்குரிய
தீவிர ஆலோசனையில் அமைச்சர் நத்தம் விஸ்வநாதன் இருப்பதாகத் தெரிகிறது.
அதிமுக ஆட்சியில் மின்வெட்டு சரி செய்யப்பட்டால், அதுவே அடுத்த தேர்தலில்
திமுகவிற்கு எதிரான பலமான ஆயுதமாக இருக்கும். அதற்காகவாவது ஜெ. தந்து இந்த
ஆட்சிக்காலத்தில் இதனைச் சரி செய்வார் என்று நம்பலாம்.


சட்டம்-ஒழுங்கைக்
கட்டிக்காப்பதில் ஜெ. எப்பவும் டாப் தான். திமுக ஆட்சியில் போலீஸாரின்
நடவடிக்கைகள் எப்போதுமே சவசவ தான். காவல்துறை தைரியமாக, தன்னிசையாக
செயல்படும் சுதந்திரமும் துணிவும் ஜெ. ஆட்சியில் மட்டுமே கிடைக்கின்றது.
இப்போதும் காவல்துறை மத்தியில் ஒரு தெளிர்ச்சி தெரிகிறது. மதுரையை
காவல்துறை சிறப்புக்குழு தன் கட்டுப்பாட்டில் சீக்கிரமே கொண்டு
வருமென்றும் தகவல்கள் வருகின்றன. பெரும்தலைகள் உருளலாம், மீண்டும்
என்கவுண்டர் வேகம் எடுக்கலாம் அப்ரூவர் ஆகாவிட்டால்!


அடுத்து நம்மை
ஆச்சரியப்படுத்தும் விஷயம் விவசாயத்தை முக்கிய விஷயமாக ஜெ.
எடுத்துக்கொண்டிருப்பது. அதைப்பற்றிப் பேசவே நேரமில்லாத தலைவர்கள்
மத்தியில், விவசாயத்திற்கு முன்னுரிமை என்பது பாராட்டப்பட வேண்டியதே. இதே
ஆர்வம் கடைசிவரை தொடர்ந்தால், எல்லாருக்கும் நன்மையாய் அது முடியும்.


பொதுவாகவே ஜெ.விடம் உள்ள
குறைபாடு, அடித்தட்டு மக்களின் பிரச்சினையைப் புரிந்துகொள்ளாத/அறிந்து
கொள்ளாத போக்கு. அதனாலேயே விவசாயத்திற்கு முன்னிரிமை என்பது நமக்கு
வியப்பை அளிக்கிறது. வரவேற்கத்தக்க மாற்றம் தான் இது. ஆனாலும்..
புதிதாகக்
கட்டப்பட்டுள்ள சட்டமன்றக் கட்டிடத்துக்குள் போக மாட்டேன் என்று
அடம்பிடிப்பது சரி என்று தோன்றவில்லை. மக்களின் வரிப்பணத்தில் பலகோடி
செலவழித்துக் கட்டப்பட்ட அதை, முழுதாக மறுப்பது ஒரு முதல்வருக்கு அழகல்ல.
மேலும் சென்னையில் பல ரோடுகளும் பாலங்களும் திமுக அரசால் கட்டப்பட்டவை
என்பதையும் நினைவில் கொள்வது நலம் பயக்கும்.


கடந்த ஆட்சிகளில் ஜெ. செய்த
முக்கியத் தவறு, ஒரு திட்டம் என்ன தான் நல்ல திட்டமாக இருந்தாலும் திமுக
ஆட்சியில் கொண்டுவரப் பட்டதென்றால் அதைத் தூக்கி குப்பைத்தொட்டியில்
போடுவது. உதாரணம் உழவர் சந்தை. அது இம்முறை நடக்கக்கூடாது என்பதே மக்களின்
விருப்பம். ஆனால் இம்முறையும் சமச்சீர்க்கல்விக்கு தடங்கல் போடுவதைப்
பார்க்கும்போது, கொஞ்சம் பயமாகத் தான் உள்ளது.


சமச்சீர்க் கல்விப்
பாடத்திட்டத்தில் கலைஞரின் வரலாறு+துதி இருந்ததாகத் தகவல்கள்
தெரிவிக்கின்றன. அது உண்மையென்றால், அவற்றை மட்டும் நீக்கி விட்டு
சமச்சீர்க்கல்வியை நடைமுறைப்படுத்துவதே ஜெ.வுக்கு நல்ல பெயரைக்
கொடுக்கும். ஏனென்றால் சமச்சீர்க்கல்வி என்பது நமது நெடுநாள் விருப்பமும்
கனவும் ஆகும்.


இந்த விஷயத்தில் மேலும் கவலை
தருவதாக நேற்றைய ஜெ.பேட்டி அமைந்து விட்டது. ‘பள்ளிகளுக்கு கல்வி கட்டணம்
நிர்ணயிப்பதில் அரசுக்கு நேரடி தொடர்பு இல்லை. பள்ளிகளுக்கு கல்விக்
கட்டணம் நிர்ணயிக்க ஒரு குழு அமைக்கப்பட்டுள்ளது. இந்த குழுதான் கட்டணத்தை
நிர்ணயிக்கிறது. அதனை பள்ளிகள் அமல்படுத்துகின்றன. எனவே இந்தப் பிரச்சனை
அவர்களுக்கு இடையேதான் உள்ளது. இதில் தலையிட வேண்டும் என்று பள்ளிகள்
விரும்பினால் அரசு அது குறித்து ஆராயும்’ என்று சொல்லியுள்ளார். இதன்
பொருள் என்ன?


இது ஒரு குழுவுக்கும்
பள்ளிக்கும் இடையிலான பிரச்ச்சினை அல்ல. இது பல்லாயிரம் ஏழை/நடுத்தரக்
குடும்பங்களுக்கும், பள்ளிகளுக்கும் இடையிலான பிரச்சினை. அந்தப்
புரிந்துணர்வுடன் அதிலும் ஜெ. தனக்கேயுரிய ஸ்டைலில் கடுமை காட்ட வேண்டும்.
அவ்வாறு இல்லாமல் பள்ளிகளுக்குச் சாதகமாக நடந்து கொண்டால், மீண்டும்
அடுத்த தேர்தலில் மக்களிடம் இருந்து பாடம் படிக்க வேண்டி வரும்.